25 urte Euskal Kostaldeko Estropada babesten

Euskadiko Kirol Portuak (EKP), Euskal Kostaldeko 34. Estropada aurkezteko prentsaurrekoan parte hartu du gaur goizean, eta berretsi egin du nautika bultzatzeko eta Euskadiko itsas ingurunea errespetatzeko duen konpromisoa.

Uztailaren 4tik, ostirala, 6ra, igandea, egingo da proba, eta 25. aldiz banatuko da Euskadiko Kirol Portuak saria, parte hartzen duten itsasontzien ahalegina eta kirol-balioak aintzat hartzea helburu duen garaikurra. Ekimena mende laurden batez babesteak argi erakusten du Euskadiko Kirol Portuak apustu sendoa egin duela itsasoa herritarrei hurbiltzeko eta Euskadi lehen mailako helmuga nautiko gisa finkatzeko.

“Euskal Kosta-Urrezko Balea Sariaren 34. edizioak bat egiten du guretzat oso berezia den mugarri batekin, EKPren 25. urteurrenarekin. Mende laurden honetan, gure konpromisoa Euskadiko aisialdiko nautika sendotzea izan da. EKPren historia, hein handi batean, gure lurraldeko olgetako nautikaren historia da”, adierazi du Edurne Egañak, Euskadiko Kirol Portuak erakundearen zuzendariak. Bereziki, klub nautikoen lana eskertu du, “gure tripulazioaren parte” gisa definitu baititu, eta “elkarrekin horizonte berrietara nabigatzen jarraitzera” animatu ditu.

34. edizio honetako ibilbidea uztailaren 4an, ostirala, hasiko da, Getxo eta Hondarribia arteko 60 miliako itsas bidaiekin. Osiris itsasontziak, berriz, Donostiatik abiatuko dira. Lehiaketaren amaiera uztailaren 6an izango da, igandea, Hondarribiko urek haizealde-haizebea motako estropadak hartuko dituztenean, Urrezko, Zilarrezko eta Brontzezko Balea garaikurren irabazleak erabakiz.

Estropadak Kantauri itsasoko eta Frantziako hegoaldeko hainbat lekutatik etorritako ontzidi nabarmena bilduko du. Izena eman duten gurutzaontzien artean daude, besteak beste, Thelonious (Jon Garay, Bizkaia), Alpega (Alfonso Churruca, Bizkaia), Txupinazo (Juan Valdivia, Bizkaia), Ramper (Jairo López de Guevara, Bizkaia), NJ (Iker Almandoz, Gipuzkoa), Sagartxo IV (Pablo Unilla, Gipuzkoa) eta Harimaitz (Gipuzkoa). Osiris klasean, Lau Haiezak (Patrick Pillot, Frantzia) eta Haizea (Jeremy Viron, Frantzia) ontziak nabarmentzen dira.

Mende laurdeneko harremana

Duela 25 urtetik, EKPk etenik gabe babesten du Kantauriko egutegi nautikoaren erreferente bihurtu den lehiaketa hau. Euskal Kostaldeko Estropadak kirola, tradizioa eta ingurunearekiko errespetua uztartzen ditu, eta aukera ematen du Euskadiren irudia jarduera nautikoetarako helmuga bikain gisa proiektatzeko.